Tungod sa Hudyaka ZANORTE Festival
Milagsik negosyo dinhi –HRRAD

Gikonfirmar ni Miss Gina Luy, kasamtangang Presidente sa Hotel and Restaurant Association of Dipolog (HRAD) nahimong paspas ug mabungahon ang lihuk sa natad sa negosyo ug sa economia sa kinatibuk-an dihang gisaw-an  sa dakbayan  ug lalawigan sa Zamboanga del Norte ang duruha ka nagsunod-sunod nga selebrasyon, ang 7th Pagsalabuk ug ang labing unang paglusad sa Hudyaka ZANORTE 2005.

Ang HRAD gilangkuban kini sa tanang mga Hotels, Pension Houses, Inns, Restaurants ug mga sama niini nga akreditado sa Department of Tourism. Si Miss Luy mipahayag sukad-masukad karon lang nakasinati sa lagsik nga dagan sa negosyo ug patigayun ang Dipolog ug lalawigan atol maong panahon nga sama sa nagfiesta kini kada adlaw.

Nasayran ang kagamhanan sa Dipolog mipatuman kini sa halus usa ug tunga ka buwan nga selebrasyon tapos gideklarar niini pina-agi sa Sanguniang Panlungsod ang mga adlaw gikan sa Mayo 23 hangtud Hulyo 1, 2005 isip Pagsalabuk Festival. Samtang ang lalawigan sa Zamboanga del Norte milusad usab sa iyang labing unang Hudyaka ZANORTE gikan sa Mayo 29 hangtud Hunyo 6, katumanan sa iyang ika 53 ka tuig nga anibersaryo.

Komentaryo sa mga miembro sa HRAD hilabihan ang pagsugwak sa mga torista local man o langyaw nganha sa mga hotels, pension houses nga gani ang uban naglisud na sa pag-akomodar kanila ug nagkadiin-diin na ug pangita sa ilang temporaryong kapuy-an. Aminado si Miss Loy karon lang kini nahitabu   taliwala sa kamatuoran kini maoy ika-pito ka tuig nang pagpahigayun sa Pagsalabuk Festival ug matag tuig sa lalawigan sa iyang Linggo ng Zamboanga del Norte.

Gihatagan pa ug gibug-aton niini, mismo ang ilang mga miembro sa HRAD nakadayeg partikular na sa kagamhanan sa lalawigan ubos ni Governor Rolando E. Yebes tungod sa dili basta-bastang pagpangandam aron ilusad ang labing unang Hudyaka ZANORTE nga pinakabibo itande sa nanglabayng selebrasyon. Matud niya, kini pa nga higayun nga nahitabu ilabi na sa Hudyaka nga gisalmutan sa halus tanang kalungsuran nga maoy nakadugang sa kasadya ug kadasig sa mga domuduong nga mobisita ug mosaksi sa maong kalihukan.

Angayang masayran, una nang gibutyag ni Atty. Michael Alan Ranillo chairman sa Provincial Tourism Council sa Zamboanga del Norte gibana-banang 15 milyones pesos ang nahimong abot sa probinsiya nga bisan ang mga kalungsuran apil usab sa nakapahimus solud lamang sa usa ka semanang selebrasyon. Kini itande sa bisan 1 ka milyon ka pesos lamang nga pundo subay sa gisugyot nga budget sa buhatan sa Gobernador ubos sa pagdason usab sa mga miembro sa Sanguniang Panlalawigan.

Si Atty. Ivan Patrick Ang, Provincial Tourism Officer dugang mibutyag gawas sa usa ka milyon ka pesos nga budget alang sa Hudyaka  Zanorte Festival, du-an sa 2 milyones ka pesos cash ug in kind ang nadawat nga donasyon sa kagamhanang probinsiyal gikan sa nagkalain-laing mga benefactors, sa mga negosyante ug mga patigayun. Dungan niini, gibutyag usab ni Atty. Ang sa sunod tuig, malauman sa tanang katawhan ilabi na sa mga bisita, torista ang mas labing masadya pang selebrasyon sa ika-duhang Hudyaka Zanorte ubos sa administrasyon ni Gob. Yebes.

Kini tapos iyang giklaro nga segurado sa sunod tuig 2006, mas daku, mas bibo apan minus gastos na nga selebrasyon para sa probinsiya sanglit karon pa lang daan, daghan nang mga negosyante ug bisan mga korporasyon ang mipadayag sa ilang intention selbing mga sponsors sa mga kalihukan nga ihan-ay alang sa ika 54 ka tuig nga anibersaryo sa ZANORTE. (Mindanao Star, Vol. I No.27)